Beschreibung der Kirmestage in Mundart: Kirmes is ä feine Sach´, die ko´ mer jedes Johr gemach!!!! Ende September is es dann endlich soweit, doch vurhar müsse mer noch eeniches vürbereit. Vom Plakate ausfahrn bis zur Einteilung für die Bar, wird alles geplant un erledicht wie jedes Jahr. Ä Woche vurm Fest wärn die Kränz gebunde, un die Händ un Füß beim Zeltaufbau gschunde. Wenn nu alles aufgestellt un fertig is, da frööt sich ä jeder, des is gwiss. Freidich un Samsdich sorche zwe super Bands für mords Gaudi un Spaß, da schaut mer a gern ä weng tiefer neis Glas. Samsdichmiddoch wärn dann die Kränz schüa gschmückt, un die Tisch un Bänk ordentlich higerückt. Sunndichfrüh is fürn Burschenverein der Kirchgang Pflicht, do sit mer dann a so manch durchzechtes Gsicht. Denoch gets zum Hütbinde zum jüngste Mädle, do gits dann en Schnaps beim Bücheln und Faden einfädle. Um drei treffe sich dann alle im Juchendheim zum Ziehen der Lose, die Mädels im Rock, die Bursche im Anzug mit Hut un neuer Rose. Bis jedes Mädle sich en Bursch gezoche hat, dün drauße scho alle aufn ümzug wart. Der jüngste Bursch läfft vurnaus und schwingt en Kranz, hinne dro dün se während es laffe zu die Musik danz. Düwes Zelt wird na erst mol ä Rund es Danzbein gesschwunge, un zum Wein ä boor Liedlich gsunge. Nochem Obedesse wird nu weiter gfeiert un gelacht, und die Nocht züm doch gemacht. Kirmesmondich gehts dann scho frühbezeit los, die Kirmesständlich sinn ganz famos. Die Bursche laffee mit die Kirmesmusikante vo Haus zu Haus, un komme oft widder mit ä Spende für ihr Wächala raus. Zwische drei un halb vier treffe alle zu Umzuch ei, un die Bursche lässe erstemol los en kräftige Gögerschrei. Die Mädlich wärn nu vur´n Schubkarrn gschpannt, der Bojazz kümmt a scho mit Glocke un Peitsche ogerannt. Hinnern Schubkarrn hängt enner vo die Bursche dro, un wird vo die Mädlich mit gschläfft, der arm Moo! Un so gehts durchs ganz Durf zum Festplatz nü, die Burschemädels troche extra zum Renne flache Schüh. Die Kirmespredigt wird vo en Bursch vorgetroche, des scho zeschreibe, des wor e Blooche! Do wird dann üwer e boor Höchhemer bericht, des sinn meist immer ganz lustige Gschicht. Als Höhepunkt kümmt der Gögerschlag am End, wo ab un zu a ma der Göger weg rennt. Er hockt zevur ganz ahnungslos unnerm Dopf, doch nach em dritte Schlag verliert er sein Kopf. Nu spielt die Musik für die Kirmesgesellschaft zum Danze auf, do gits erst emol en kräftige Gögerschrei drauf. Im Zelt sücht sich dann ä jeder en Platz zum Sitze, denn durchs danze kümmt mer ganz schö ins Schwitze. Nochem Kaffee gets dann ach gleich nei die Bar, die hommer on Mondich für uns, wie jedes Jahr. Bis in die frühen Morgenstund wird so richtig Party gemacht, ans aufhörn wird da noch lang net gedacht. Am nächste dooch is die Kirmes leider scho widder üm, beim Aufräma laffe doswache viele mit lange Gsichter rüm. Ower ä jeder fröht sich dann a scho aufs nexte ma, wenns widder heißt: “Die Kirchweih die ist wieder da!”